วสฺสํวุฏฺฐวิหารมฺหา , วิหารญฺญํ คโต สิยา;

อาคจฺฉํ อนฺตรามคฺเค, ตทุทฺธารมติกฺกเมฯ

[2719]

ตสฺส โส กถินุทฺธาโร, สีมาติกฺกนฺติโก มโต;

กถินานิสํสมาทาย, สาเปกฺโขว สเจ คโตฯ

[2720]

สมฺภุณาติ ปุนาคนฺตฺวา, กถินุทฺธารเมว เจ;

ตสฺส โส กถินุทฺธาโร, ‘‘สหุพฺภาโร’’ติ วุจฺจติฯ

[2721]

ปกฺกมนญฺจ นิฏฺฐานํ, สนฺนิฏฺฐานญฺจ สีมโต;

จตฺตาโร ปุคฺคลาธีนา, สงฺฆาธีนนฺตรุพฺภโรฯ

[2722]

นาสนํ สวนญฺเจว, อาสาวจฺเฉทิกาปิ จ;

ตโยปิ กถินุพฺภารา, น ตุ สงฺฆา, น ภิกฺขุโตฯ

[2723]

อาวาสปลิโพโธ จ, ปลิโพโธ จ จีวเร;

ปลิโพธา ทุเว วุตฺตา, ยุตฺตมุตฺตตฺถวาทินาฯ

[2724]

อฏฺฐนฺนํ มาติกานํ วา, อนฺตรุพฺภารโตปิ วา;

อุพฺภาราปิ ทุเว วุตฺตา, กถินสฺส มเหสินาฯ

[2725]

อนามนฺตาสมาทานํ, คณโต ยาวทตฺถิกํ;

ตตฺถ โย จีวรุปฺปาโท, อานิสํสา จ ปญฺจิเมฯ

กถินกฺขนฺธกกถาฯ

จีวรกฺขนฺธกกถา

[2726]

จีวรสฺส ปนุปฺปาทา, อฏฺฐ จีวรมาติกา;

สีมาย เทติ, กติกา, ภิกฺขาปญฺญตฺติยา, ตถาฯ

[2727]

สงฺฆสฺส, อุภโตสงฺเฆ, วสฺสํวุฏฺฐสฺส เทติ จ,;

อาทิสฺส, ปุคฺคลสฺสาติ, อฏฺฐิมา ปน มาติกาฯ

[2728]

ตตฺถ สีมาย เทตีติ, อนฺโตสีมํ คเตหิ ตุ;

ภิกฺขูหิ ภาเชตพฺพนฺติ, วณฺณิตํ วรวณฺณินาฯ

[2729]

กติกาย จ ทินฺนํ เย, วิหารา เอกลาภกา;

เอตฺถ ทินฺนญฺจ สพฺเพหิ, ภาเชตพฺพนฺติ วุจฺจติฯ

[2730]

สงฺฆสฺส ธุวการา หิ, ยตฺถ กรียนฺติ ตตฺถ จ;

ภิกฺขาปญฺญตฺติยา ทินฺนํ, ทินฺนํ วุตฺตํ มเหสินาฯ

[2731]

สงฺฆสฺส ปน ยํ ทินฺนํ, อุชุภูเตน เจตสา;

ตญฺหิ สมฺมุขิภูเตน, ภาเชตพฺพนฺติ วุจฺจติฯ

[2732]

อุภโตสงฺฆ มุทฺทิสฺส, เทติ สทฺธาย จีวรํ;

โถกา วา พหุ วา ภิกฺขู, สมภาโคว วฏฺฏติฯ

[2733]

วสฺสํวุฏฺฐสฺส สงฺฆสฺส, จีวรํ เทติ ยํ ปน;

ตํ ตสฺมิํ วุฏฺฐวสฺเสน, ภาเชตพฺพนฺติ วณฺณิตํฯ

[2734]

ยาคุยา ปน ภตฺเต วา, เทติอาทิสฺส เจ ปน;

จีวรํ ตตฺถ ตตฺเถว, โยเชตพฺพํ วิชานตาฯ

[2735]

ปุคฺคลํ ปน อุทฺทิสฺส, จีวรํ ยํ ตุ ทียติ;

ปุคฺคโลทิสฺสกํ นาม, ทานํ ตํ ตุ ปวุจฺจติฯ

[2736]

สหธมฺมิเกสุ โย โกจิ, ปญฺจสฺวปิ ‘‘มมจฺจเย;

อยํ มยฺหํ ปริกฺขาโร, มาตุยา ปิตุโนปิ วาฯ

[2737]

อุปชฺฌายสฺส วา โหตุ’’, วทติจฺเจวเมว เจ;

น โหติ ปน ตํ เตสํ, สงฺฆสฺเสว จ สนฺตกํฯ

[2738]

ปญฺจนฺนํ อจฺจเย ทานํ, น จ รูหติ กิญฺจิปิ;

สงฺฆสฺเสว จ ตํ โหติ, คิหีนํ ปน รูหติฯ

[2739]

ภิกฺขุ วา สามเณโร วา, กาลํ ภิกฺขุนุปสฺสเย;

กโรตฺยสฺส ปริกฺขารา, ภิกฺขูนํเยว สนฺตกาฯ

[2740]

ภิกฺขุนี สามเณรี วา, วิหารสฺมิํ สเจ มตา;

โหนฺติ ตสฺสา ปริกฺขารา, ภิกฺขุนีนํ ตุ สนฺตกาฯ

[2741]

‘‘เทหิ เนตฺวาสุกสฺสา’’ติ, ทินฺนํ ตํ ปุริมสฺส ตุ;

‘‘อิทํ ทมฺมี’’ติ ทินฺนํ ตํ, ปจฺฉิมสฺเสว สนฺตกํฯ

[2742]

เอวํ ทินฺนวิธิํ ญตฺวา, มตสฺส วามตสฺส วา;

วิสฺสาสํ วาปิ คณฺเหยฺย, คณฺเห มตกจีวรํฯ

[2743]

มูลปตฺตผลกฺขนฺธ-ตจปุปฺผปฺปเภทโต;

ฉพฺพิธํ รชนํ วุตฺตํ, วนฺตโทเสน ตาทินาฯ

[2744]

มูเล หลิทฺทิํ, ขนฺเธสุ, มญฺเชฏฺฐํ ตุงฺคหารกํ;

ปตฺเตสุ อลฺลิยา ปตฺตํ, ตถา ปตฺตญฺจ นีลิยาฯ

[2745]

กุสุมฺภํ กิํสุกํ ปุปฺเผ, ตเจ โลทฺทญฺจ กณฺฑุลํ;

ฐเปตฺวา รชนํ สพฺพํ, ผลํ สพฺพมฺปิ วฏฺฏติฯ

[2746]

กิลิฏฺฐสาฏกํ วาปิ, ทุพฺพณฺณํ วาปิ จีวรํ;

อลฺลิยา ปน ปตฺเตน, โธวิตุํ ปน วฏฺฏติฯ

[2747]

จีวรานํ กถา เสสา, ปฐเม กถิเน ปน;

ตตฺถ วุตฺตนเยเนว, เวทิตพฺพา วิภาวินาฯ

จีวรกฺขนฺธกกถาฯ

มหาวคฺโค นิฏฺฐิโตฯ

จูฬวคฺโค